Ab tak aapne padha ki Shaadi waley din Priyanka aur Anju ko saja sawra dekhkar Kabir aur Rajesh ke dil machalane lage. Dusri taraf Abhi apne khoye pyaar Shifa ko itne samay baad dekh kar awaak rah gaya.

Ab aage…

Peechhe se koi bada saaman la raha tha isliye Shahbaz ne apni biwi Shifa ka kandha pakad kar apne paas kar dusro ko jagah di. Iske baad Shifa ne apne kandhe se Shahbaz ka haath hataya aur phir se thoda dur khadi ho gayi.

Background mein music baj raha tha aur Abhi ab Shifa ki taraf aage badha. Shifa ki najar abhi tak Abhi par nahi padi thi aur wo daaye baaye tension mein dekh rahi thi.

Jab Abhi thoda karib aaya to Shifa ki najre ghumte huye Abhi par thhahar gayi aur uska dil baithh sa gaya. Usko ummeed thi ki Abhi shaadi mein aaya hoga par wo usko receive karne aayega yeh nahi pata tha.

Shifa ke gulaabi honthh thode khul se gaye the aur najre Abhi par tik gayi. Uski palko ne jhapkana band kar diya. Shifa ne Abhi ko Rajesh-Priyanka ki shaadi mein chhup chhup kar dekha tha aur saamne aane se bachti rahi thi.

Hawa se Shifa ke khule baal ud kar aakho aur gaal par aa gaye. Abhi kabhi inhi udti julfo aur baalo ko Shifa ke chehre se hata kar uske khilte chehra ko dekhta tha. Thodi dur se hi anaayas hi Abhi ka haath upar uthh gaya taaki Shifa ke chehre par aaye baalo ko hata paaye.

Aaj Abhi ke paas wo adhikaar nahi tha aur Shifa ne khud hi apne lahraate baal chehre se hataaye. Abhi ne apna uthhata hua haath neeche kar diya. Abhi halki smile ke saath Shifa ki najro se najre milaate huye ekdum paas pahuch gaya.

Ujjawal ke muh se “Sssshifa” shabd kharkhraati huyi aawaj mein badi mushkil se nikla. Abhi ne apna gala saaf kiya.

Shahbaz: “Hi, main Shahbaz. Tum Abhi ho na, tumse baat huyi thi”

Shahbaz ne muskuraate huye puchha aur haath milaane ko aage badhaya. Abhi ne bhi haami bharte huye haath milaya. Abhi ne Shifa ki taraf dekha jo dusri taraf dekh rahi thi.

Abhi: “Chalo Shahbaz, main Kabir ke paas le chalta hoon”

Wo teeno side by side ek saath chalte huye aage badhe. Shifa aur Abhi ke beech Shahbaz chal raha tha. Abhi ne 2-3 baar dusri taraf chalti Shifa ko dekha.

Shifa ka dhyaan sirf aage ki taraf tha jo baar baar apne khule baalo ko sambhaal kar peechhe kar rahi thi. Abhi man hi man khush ho raha tha.

Thodi der mein wo teeno Kabir ke kamre se thodi hi dur the. Abhi ruk gaya aur haath ke ishaare se kamre ka darwaja dikhaya. Shahbaz aur Shifa Kabir ke kamre ki taraf badhe.

Abhi wahi ruk gaya aur Shifa ko jaate huye dekhne laga. Tabhi Shifa ne peechhe mudkar apne tikhe naino se Abhi ko dekha.

Shifa ke naino se jaise teer nikal kar Abhi ke seene mein ghus gaye. 2 second mein hi Shifa phir aage dekhkar chalne lagi. Shahbaz aur Shifa dono ab darwaaje ke baahar the aur darwaja knock kiya.

Abhi bhi chalta hua waha pahuch gaya. Rajesh ne darwaja khola aur Shifa aur Shahbaz dono ko dekhkar unhe khushi se gale lagaya.

Shahbaz ne Kabir ko badhai de gale lagaya. Priyanka ne Shifa ko gale lagaya. Shifa ne smile karte huye Kabir ko badhai di aur gale lage.

Priyanka ne phir Shahbaz aur Shifa ko Anju se pahli baar milvaya. Anju ka naam sunte hi Shifa ka dil bhi dhakk se rah gaya. Anju ne Shifa ki jagah Abhi ke dil mein jo le li thi.

Shifa magar sambhal kar Anju se mili. Priyanka ne peechhe khade Abhi ko aankh se ishara kar smile karte jaise sawaal puchha ki uski mulaaqat kaisi rahi.

Abhi ne gardan hila kar nirasha mein jawaab diya. Priyanka ne aankho ke ishare se usko thoda sabra rakhne ko kaha. Wo sab log wahi lagi kursiyo par baithh gaye.

Kabir: “Problem to nahi huyi na raasta dhundhne mein”

Shahbaz: “Nahi, kal raat aapme se kisi ne phone uthaya nahi magar Abhi ne help kar di thi to pareshani nahi huyi”

Kabir: “Sorry, yaha bahut shor tha music ka. Abhi ne bataya tha baad mein humko tumse baat huyi thi”

Shahbaz: “Thanks to Abhi. Magar Shifa, tumney kabhi Abhi ke baare mein bataya nahi!”

Shifa kuchh bolna chaahti thi par koi shabd hi nahi sujhe ki kya bole. Priyanka ne phir se baat sambhaal li.

Priyanka: “Koi baat nahi, ab mil lo. Hum paancho logo ki toli thi. Main, Rajesh, Kabir, Abhi aur Shifa. College time par achchhe bure waqt mein hamesha ek saath rahte the”

Anju: “Mujhe bhi Shifa ke baare mein nahi pata tha. Mere saamane kisi ne baat hi nahi ki”

Rajesh: “Shifa ki shaadi sabse pahle ho gayi thi, phir sab idhar udhar bikhar gaye. Haalanki hum baaki log milte rahte hain”

Shahbaz: “Sorry dosto, meri vajah se aap logo ki dosti mein thodi duriya aa gayi. Mujhe koi problem nahi hain aap sab log milo jhulo. Main bhi join kar lunga agar koi problem nahi hain to”

Kabir: “Yeh to achchhi baat hain. Bahut jaldi hum kuchh plan karte hain.”

Tabhi Kabir kii mummy aa gayi, baahar pundit ji aa gaye the hawan ke liye aur Kabir ko jana tha. Kabir jaane laga aur saath mein dosto ko bhi aane ko kaha.

Priyanka: “Shifa, tum yahi ruko, tumse kaam hain”

Priyanka aur Kabir ke beech aankho hi aankho mein ishara hua aur dono samajh gaye. Shifa aur Priyanka wahi baithhe rahe aur baaki log baahar gaye.

Thoda baahar aage jaane ke baad Kabir ruka.

Kabir: “Abhi, mere kamre mein bed par saamaan rah gaya hain, jara le aana”

Abhi: “Kaun sa saaman?”

Kabir: “Tu ja to sahi, dikh jaayega”

Rajesh bhi samajh gaya tha aur Abhi ko aankho ke ishaare se jaane ko bol diya. Abhi ulte kadam Kabir ke kamre ki taraf badha.

Kabir, Rajesh, Anju aur Shahbaz baahar pahuche jaha baarat rawaana hone se pahle pooja aur hawan hone wala tha.

Abhi ka dil teji se dhadak raha tha aur wo ek baar phir Kabir ke kamre ke darwaaje tak pahucha aur andar Priyanka aur Shifa ko baithhe huye baat karte dekha.

Priyanka to Abhi ka hi wait kar rahi thi. Priyanka uthh gayi aur Abhi ko waha dekhkar Shifa bhi apni jagah se uthh khadi huyi taaki Priyanka ke saath jaa paaye.

Magar Priyanka ne Shifa ko wahi baithha diya aur darwaaje ke paas gayi jaha Abhi khada tha.

Abhi: “Kabir ka koi saamaan bistar par rah gaya hain wo lene aaya hoon”

Priyanka: “Kabir ka koi saaman nahi rah gaya. Bas tumhara ek khoya hua saaman andar hain, baat kar lena aaram se. Main baahar hi khadi hoon”

Abhi kamre ke andar aaya aur Priyanka ne baahar jaakar darwaja band kar diya. Abhi chalta hua Shifa ke paas aaya. Shifa kursi se uthh khadi huyi, najre jhukaaye waha se jaane lagi.

Abhi: “Naaraj ho Shifa?”

Shifa ruk gayi aur usne apna sir upar uthhate huye Shifa ki aankho mein jhaanka. Uska chehra gambhir tha. Abhi ne smile karte huye usko dekha.

Shifa: “Tumhe kya farq padta hain!”

Abhi: “Padta hain, tum maano ya na maano”

Shifa: “Maine kaha tha tumko ki bhaag chalte hain, magar tum kaha maane! Meri shaadi ka card dene aay ith itab bhi besharmi se le liya”

Shifa ki aawaj mein ek rulaayi thi aur usne apne aap ko sambhaal kar control kiya.

Abhi: “Kis se bhaagte, tumhaare aur mere ghar walo se, saari duniya se?”

Shifa: “Tum mujhe chaahte the ya duniya ko?”

Abhi: “Tumhe pata hain, tum hi meri duniya ho”

Shifa: “Tum sirf baatein banaana jaante ho. Tumhe pata bhi hain pichhle do saalo mein mere upar kya gujri hain … ”

Shifa ki aankhe bhar kar chhalchhala aayi aur phir sir jhukaate huye wo aankhein ponchhti subakane lagi. Abhi ka bhi dil paseej gaya par wo kya karta.

Abhi: “Shifa, tumhe pata hain ki main tumhe rote huye nahi dekh sakta hoon. Pata hain na jab tum pahli baar mere saamne royi thi!”

Abhi muskura diya aur Shifa ne apne aansu ponchhte huye Abhi ki taraf dekha aur rote huye bhi smile nikal gayi.

Shifa: “Yaad hain mujhe. Tum 5 ghante tak college ke us ground mein akele mere paas baithhe mujhe manaate rahe”

Abhi: “Haa, aur tum itni der tak itni si baat ke liye roti rahi ki tum college ke beauty contest mein Priyanka ke baad second number par aayi thi”

Shifa: “Hmmm.. Aur agle din tum Priyanka se jaakar wo trophy le aaye mujhe dene ke liye”

Shifa ki muskaan waapis laut aayi haalanki uski aankhein abhi nam thi.

Abhi: “Bahut sundar lag rahi ho tum, hamesha ki tarah”

Shifa: “Jhoothhe kahi ke. Anju mujhse bhi jyada sundar hain”

Abhi: “Maine tumhe tab bhi kaha tha, mere liye tum hi sabse sundar ho. Meri beauty queen tum hi rahogi”

Shifa: “Pakka!”

Abhi: “Haa”

Shifa ki muskaan poori laut aayi thi aur aankhon ki chamak barkaraar thi.

Abhi: “Itne time baat kyu nahi ki, gussa thi?”

Shifa: “2 saal se tum par itna gussa aa raha hain ki kya batau”

Abhi: “Tumhaare saamne khada hoon, nikaal lo apan gussa mujh par”

Shifa: “Tum saamne aate ho to gussa gaayab ho jata hain. Waise bhi sara gussa ghar ke saaman par nikaal deti hoon. Pata nahi kitney hi saaman tod diye maine ghar par”

Abhi: “Yeh to tumhaari puraani aadat hain. Ek baar gusse mien mera shirt faad diya tha. Fate huye shirt ke saath baniyaan pahne ghar jana pada tha mujhe”

Shifa khilkhila kar hans padi aur uska saath dekar Abhi bhi hans pada.

Shifa: “Sorry, main tumhaari shaadi mein nahi aa paayi”

Abhi: “Main bhi to tumhaare shaadi mein nahi aaya tha, mera bhi sorry”

Shifa: “Achchha hua tum nahi aaye, varna main wahi par tumhara khoon kar deti”

Abhi: “Kar deti to achchha hota, mujhe mukti mil jaati tumhaaare haatho”

Shifa Abhi ki aankho mien dekhne lagi aur Abhi ne phir najre jhuka li. Thodi der dono chup rahe.

Next episode mein padhiye do premiyo ka punarmilan kaise aage badhta hain.